Tatlong Villanelle Para sa Mga Supíl

SUPÍL MAN NG MGA  DI-TIYAK

Supíl man ng mga di-tiyak

Wala mang sinta at sinaing

Babangon pa rin at gagayak.

Bubuhatin ang mga yabag

Walang daíng na sasambitin

Supíl man ng mga di-tiyak.

Ang araw ba'y maglalagablab?

O delubyo ang paparating?

Babangon pa rin at gagayak.

Sasabit sa palpak na oras.

Ang pag-asa ay sisiksikin.

Supíl man ng mga di-tiyak.

Ang iuuwi kaya'y sapat?

Baka ngayon na patalsikin?

Babangon pa rin at gagayak.

Para kanino ang ulirat?

Hanggang kelan hindi bibitiw?

Supíl man ng mga di-tiyak,

Babangon pa rin at gagayak.

SA IYONG KAPAGURAN

Oo nga't supíl na supíl ka ng pagod.

Sa umaga'y yagyag, sa pag-uwi'y gapang.

Heto't nanghahalina ang aking hagod.

Diwa'y lutang at lupasay ang gulugod.

Espiritu'y laylay at pagá ang paypay.

Oo nga't supíl na supíl ka ng pagod.

Halika na't dumapá.  Hubdin ang saplot.

Hayaang humayahay sa aking kamay.

Heto't nanghahalina ang aking hagod.

Oo, ika'y pigá.  Ako na'ng kakayod.

Nais mo ba'y madiin o katamtaman?

Oo nga't supíl na supíl ka ng pagod.

Hayaang pag-ibig ko ang ipanghilot.

Lábi ang panghaplos, dibdib ang pangdantay.

Heto't nanghahalina ang aking hagod.

Oo nga't ang mundo ay nakaka-upos.

Heto't naghihintay ang aking kandungan.

Oo nga't supíl na supíl ka ng pagod.

Heto't nanghahalina ang aking hagod.

MARAHIL, HINDI MO AKO MASASAKTAN

Marahil, hindi mo ako masasaktan.

Hindi mo kailangang magpaumanhin

Kung ang isip mo'y supíl ng kahapisan.

Inilikha kita ng ligtas na bahay

Sa aking loob.  Hindi man bisitahin,

Marahil, hindi mo ako masasaktan.

May mga sigaw na 'di napakawalan

May luhang sa gilid ng mata'y nabítin

Kung ang isip mo'y supíl ng kahapisan.

Kung hindi matanggap ang iniaalay

Na pag-aaruga, kanlungan at lambing,

Marahil, hindi mo ako masasaktan.

Ang puso'y di napipiit sa kulungan.

May laya ka pa ring sundin ang naisin

Kung ang isip mo'y supíl ng kahapisan.

May naknak din akong walang malagusan.

Buksan ma't hindi ang damdamin sa akin,

Marahil, hindi mo ako masasaktan,

Kung ang isip mo'y supíl ng kahapisan.

Lahok sa Saranggola Blog Awards 12